政情：政局動盪 青年峰會延期
為咗增加對青少年嘅支援，民政事務局及青年事務委員會每隔幾年就會舉辦「青年高峰會議」，等青年可以就關注嘅課題向政府官員及嘉賓表達意見。今年嘅青年高峰會原定喺本月底舉行，但由於佔領行動至今仍未有結束迹象，籌備委員會於是押後明年首季舉行。
青年事務委員會主席陳振彬（Bunny）話，由於參加佔領行動嘅多數係年輕一代，佢哋覺得如果要有效解決青年問題，就一定要親自聽取佢哋嘅聲音，所以佢哋決定押後及調整各項活動項目及安排，務求令青年高峰會議可更加切合青年嘅需要。自從佔領行動爆發以來，Bunny亦落過幾次佔領區同後生仔傾偈，了解佢哋對政府同各項政策嘅睇法。
倘邀約 「驚雙學唔嚟」
既然Bunny講到明想聽後生仔意見，不妨考慮邀請學聯及學民思潮成員出席研討會，等佢哋直接向官員表達青年嘅訴求，相信到時一定會非常精彩。Bunny就話，最驚佢哋唔嚟咋！