政情：謝偉俊求神 盼志偉大勝
選舉無情，永遠希望對手愈少票愈好，但喺比例代表制下，玩法就好講求配票，甚至希望敵對陣營嘅對手贏到開巷，令自己贏面提升。好似今屆取得立法會九龍東選區末席的獨立議員謝偉俊（Paul），竟然求神拜佛望同區嘅民主黨（白鴿黨）胡志偉下屆贏多一萬幾千票，藉此分薄其他泛民主派票源，令捲土重來嘅熱血公民黃洋達唔夠票當選。不過，選舉點會咁理想，阿Paul都係自求多福好過。
阿Paul今屆贏得險
其實今屆阿Paul都贏得好險，因為建制派喺九龍東只取得四成選票，但五個議席中竟然攻下三席，好大程度都同泛民內訌「自相殘殺」有關。話說一二年立法會選舉中，兩位激進派參選人社民連陶君行及黃洋達，分別取得兩萬七千幾票及三萬六千幾票，阿Paul最終只係比黃洋達多二千票左右當選，換句話如果陶君行棄選，激進派勢力票源隨時過戶至黃洋達，阿Paul可以打定輸數。
聽聞阿Paul都收到風，陶君行下屆未必再選，咁無咗阿陶幫手分薄票源，可以靠邊個？惟有靠胡志偉擔當呢個角色。有熟悉九龍東地區形勢人士話，白鴿黨近年喺九龍東不斷跌票，由高峰時期前議員李華明嘅六萬票，到胡志偉擔正後得番四萬幾票，如果下屆該黨票源繼續萎縮，只會益咗激進泛民黨派。
傳「操盤人」錫住胡
所以目前只得兩個情況係對阿Paul最有利，一係胡志偉狀態回勇，最好取逾五萬票，此消彼長下，黃洋達就未必咁易取代阿Paul嘅末席位置。而另一個情況就係畀黃洋達完全擊潰胡志偉，等胡志偉得票仲低過阿Paul。
不過，第二個情況不利建制派，聽聞「操盤人」都唔想黃洋達呢類激進勢力抬頭，所以一直都算錫住胡志偉，包括下令叫建制派唔好主攻胡嘅地區樁腳，留佢一條生路，藉此保住阿Paul個議席。不過，一切都只係紙上談兵，選舉時到底係咪真係順利操作，仲要視乎好多因素。