港府成日話要拓展旅遊資源，其實香港唔係冇旅遊資源，而係港府沉香當爛柴，加上宣傳不足，好多自然美景居然冇人識。港產官僚暴殄天物，浪費資源，你話係咪敗家吖。
香港世界級旅遊資源喺邊度？唔係主題公園，亦唔係維港兩岸，而係擁有世界最古老最壯觀六角柱石嘅地質公園。唔講唔知，除咗親臨其境實地參觀，仲可以參加公園主辦嘅導賞船團，出海欣賞大自然嘅鬼斧神工之餘，加埋專業導遊親自講解，仲唔快啲報名參加？勢估唔到，咁超值嘅享受，竟然冇乜人幫襯！
嗱，西貢海濱長廊攤檔林立，熱鬧非常，但幾十米外有個海濱花園就好少人去。嗰度有個火山認知館，幾乎冇人知。原來，火山認知館由漁護署設立，西貢社區中心營運、由通過評審符合資格導賞員帶隊嘅地質公園導賞團。當局嘅構想就巴閉咯，話認知館有能力每星期接待三百幾人出海觀賞喎，查實每個星期平均只得八十人報名，只係人數上限嘅兩成半。連負責人都承認，好多遊客唔知有呢個館，更唔知道有專業導賞團咁超值，簡直係嘥料！
點解會咁？咪因為官僚失職，宣傳不力囉。本報記者現場勘查發現，西貢海濱長廊既冇指示牌介紹「火山認知館」同「專業地質公園導賞團」，而展館本身亦冇醒目招牌或大型標誌，只係喺對面有個指示牌，門口有個迷你館名，係咁多。莫講話一般遊客唔會留意，就算專程嚟到都未必搵得到。呢，有遊客就係因為搵唔到地方，焗住幫襯附近攤檔推介嘅無導賞員旅行團。
你話認知館喺深山野嶺就話啫，幾十米距離，喺人頭湧湧嘅海濱長廊豎個指示牌，有幾難吖？ 舉手之勞都唔做，證明漁護署官僚做事求其是但，呢啲咪叫捉到鹿唔識脫角囉。
講起港產官僚嘥料，三日三夜講唔完。呢，沙頭角荔枝窩有全港唯一嘅百花藤樹林、超過三百年歷史嘅客家圍村，仲有四億年前形成嘅多種沉積岩，三年前更獲擢升為香港世界地質公園，咁靚嘅環境一樣冇乜人幫襯，主要因為交通極之不便，要攀山涉水，經迂迴山路步行兩小時至去得到，仲要係步步驚心嗰隻，梗係「遊客止步」喇。
點講都好，地質公園係大自然嘅慷慨饋贈，係香港彌足珍貴嘅旅遊資源，浪費實在可惜。所以話啫，唔係香港冇旅遊資源，而係港府太無能，官僚太廢柴，市民太無奈。美國前總統列根話過，政府唔可以解決問題，因為佢哋本身就係問題，真係一啲都冇講錯o架。