政情：張宇人改送食物撐警
自由黨之前因應佔領行動而發起募捐活動支援前線警員，但被外界質疑舉動破壞警隊中立性，結果令該黨煞停捐錢。不過，該黨飲食界立法會議員張宇人（Tommy）透露，上星期五去健身室做運動時巧遇前警務處長李明逵，對方教路可以向經常加班嘅警員送上滋補湯水，令佢心生一計，決定同旺角幾間餐廳合作，每日向警隊送上足料滋補湯水、糖水或生果，以答謝警隊個多月來嘅辛勞。
「唔係想博出鏡」
自由之友及香港飲食業聯合總會二十名代表，尋日帶同巨型橫額同慰問信去灣仔警察總部，宣布發起「支持前線警隊」打氣行動。Tommy強調，行動係由飲食業界發起，至今已經籌到三百萬元，預計可以為警隊提供三個月食物，又話如果反應良好，可以考慮增加食物種類，等每日執勤嘅警員可以有啖好食。Tommy又重申，行動同政治無關，亦唔係想博出鏡，只係為警隊打打氣咁話。