政情：社民連續命 搭通雙學?

乘機吸年輕票源

社記與學民思潮經常眉來眼去，喺政圈內人所皆知，好似長毛係第一個話要五區總辭，學民仔就話支持五區總辭。到後來有人話五名泛民議員一齊辭職太高風險，長毛改口話只要超級區議員辭職就得，結果學民仔亦繼續硬撐長毛。最近長毛話就算冇泛民議員肯辭職，佢都願意單拖搞新界東一區變相公投，點知學民仔亦冇話反對，認真「聽教聽話」。

其實長毛年紀都唔細，如果佢辭職後由黃浩銘或吳文遠替補出選，絕對有利第二梯隊接棒。近日有心水清嘅社記中人就諗到條好橋，就係長毛辭職後由學生代表參加補選。如果由學生出戰，會令成場選舉更「純潔」，選民投票時都唔需要糾纏喺「投人定投議題」嘅困惑之中，加上餘下任期得番不足兩年，選贏到亦唔使太擔心。

現時政治氣候最興「票債票償」，如果真係成事，睇怕唔少學生都對社記「讓賢」呢幕刻骨銘心，到一六年立法會選舉，隨時投桃報李選番社記候選人。有政界中人分析，今次佔領行動令二十二歲以下嘅年輕選民急增，如果社記能夠順利吸納學生票源，絕對有利延續社記壽命，又可以擺脫只靠長毛一人嘅命運。

黎汶洛隨時加入

社記亦一早有意從學民思潮嘅骨幹成員入面揀蟀，聽聞學民發言人之一嘅黎汶洛就同社記中人經常合作，將來好有機會加入社記，過多一、兩年後，黎汶洛亦夠年齡出選立法會，隨時係社記嘅秘密武器。

講起社記，佢哋向來缺水，每年全靠七一同黨慶兩大重頭戲籌款，本來今個月底就係黨慶大日子，但為遷就佔領行動，決定將黨慶推遲至明年一月舉行。咁快定到日子，唔通社記中人都預計佔領行動會喺年底前結束？