中環出更：潮商首位女副會長出爐
傳統潮州人向來重視家庭觀念，主張男主外、女主內，但隨時代改變，男女地位漸趨平等。香港潮州商會日前喺灣仔會展舉行新一屆會董就職禮，從事製衣企業嘅高佩璇（Winnie）創先例當選會內第一名女副會長。Winnie話，商會能夠與時並進，一班董事局成員亦好開明，明白男女各有所長，所以董事局選舉都無分男女。
其實由上屆開始，前會長周振基已經於商會內成立婦女委員會，可見商會對女成員同樣重視。Winnie補充話，雖然佢哋備受重視，但仍不忘秉承潮州女性嘅優良傳統，做一個入得廚房出得廳堂嘅溫柔女子，在家相夫教子，喺商會就輔助其他成員。卓妮仲記得，Winnie閒時潛心佛學，曾兩次倡贊佛舍利及佛頂骨舍利赴港祈福。
新會長張成雄被讚「三良」
除咗男女平等，商會亦響應惜食文化。新任會長張成雄有見過往宴會廚餘太多，日前特別建議將就職典禮及晚宴分開場地進行，等會董們唔使為咗出席儀式，同時綑綁式報名參加晚宴。當晚卓妮所見，有報名參加晚宴嘅人，真係有乖乖坐低食飯，雖然只有四道菜式，但精簡大方，不失禮之餘又夠環保，幾乎每枱都食到乾乾淨淨。
當晚出席就職禮嘅嘉賓眾多，包括勞工及福利局局長張建宗（小肥張）等官員，仲有香港科技大學校長陳繁昌等。小肥張致詞時賣口乖大讚張成雄係「三良老闆」，有良心、有「糧」出、又善良，仲話當年張成雄結束經營三十年嘅酒樓時，竟有員工掉轉頭花錢買咗塊金牌畀老闆，令佢印象深刻喎。
卓妮