古人話，「口言善，身行惡，國妖也。」睇吓人稱「淫賤黎」嘅壹淫媒主席黎智英喺佔領行動中嘅醜態，就知道古人一啲都冇講錯。淫賤黎口口聲聲爭取民主，其實唯恐天下不亂，最卑鄙兼陰險嘅係，佢為咗達到不可告人嘅政治目的，不斷煽風點火，將學生作為政治炮灰，簡直係妖孽中嘅妖孽！
呢，佔領行動將香港搞到七國咁亂，引起天怒人怨，睇見逐漸式微，無以為繼，幕後黑手唔甘心失敗，仲想繼續掙扎。學生組織建議反對派立法會議員辭職引發「公投」，本來想製造一場反高潮，點知政客各懷鬼胎，反應冷淡；學聯無計可施，竟然聽人唆擺，揚言趁亞太經合組織峰會喺北京舉行之際派人北上，要求同總理李克強等國家領導人對話喎。
即係咁，青年人有理想同激情好正常，但如果不切實際，理想只會變成幻想，激情只會變成激進。先唔講學聯可唔可以成功闖關，就算去到北京，咁又點呢？唔通佢哋想見邊個就見邊個咩，喺香港佢哋就可以無法無天啫，去到北京又點到佢哋為所欲為吖，一個唔小心，隨時有去冇回都似。
只要頭腦稍為正常嘅人，都知道學聯嘅要求既幼稚又狂妄，根本冇可能實現。點知淫賤黎居心不良，竟然聲稱學生上京冇風險，最多只係被拒入境或被捕，「被人拉仲好，到時會有五十萬人走出嚟」喎。你話嘞，淫賤黎係咪陰毒吖？唆擺學生上京抗爭，等於叫學生自投羅網，唔止誤人子弟，簡直毀人前途。既然佢講到自己咁偉大，點解唔肯為民主犧牲呢？點解又唔叫自己仔女上京抗爭呢？嗱，如果淫賤黎肯犧牲小我，完成大我，相信唔止五十萬人走出嚟，隨時過百萬人上街──慶祝o架。
所以話，慶父不死，魯難未已。愈來愈多市民怒斥淫賤黎係漢奸走狗，禍港殃民，真係冇講錯o架。佢勾結外部勢力，搞到香港永無寧日，妖孽不除，港人又點會有好日子過吖。
話時話，佔領行動已經持續咗個幾月，究竟幾時至肯落幕呢？唔通真係由得佢哋無法無天？正所謂，人必自侮而後人侮之，港府無能為力，中央束手無策，睇住香港一步步走向毀滅，實在可悲。如果一個國家真正強大，外部勢力就算想搞搞震都無從入手，相反，如果執政者軟弱無能，咁就好難唔出事囉。講到底，打蛇打七寸，擒賊先擒王，尋日又有團體請願，要求港府依法辦事，將禍亂香江嘅淫賤黎及佔中搞手繩之以法，呢啲就係多數市民嘅心聲喇，當局聽到未吖！