民主黨（白鴿黨）將會在下月改選中委，亦會選出新一屆正、副主席。而在一二年曾經挑戰現任白鴿黨主席劉慧卿（卿姐）同該黨立法會議員單仲偕出選主席嘅黨內乳鴿、南區區議員區諾軒就有意再度參選主席。
區諾軒仲話，為咗令選舉有競爭，黨內都有幾位前輩都支持佢參選。不過，如果卿姐角逐連任，相信區諾軒都只係陪跑居多，支持乳鴿參選只不過係該黨內嘅老鴿所搞嘅一場樣板戲啫。
當年越級挑戰失敗嘅區諾軒就話，為咗令白鴿黨年輕化及要一場有競爭嘅選舉，所以佢會繼續參選。佢仲話，近日已經籌備緊政綱，仲會搵黨內「三山五嶽之人」提名自己，強調今次係好認真咁話。
雖然有乳鴿唔怕陪跑，但黨內亦有人心灰意冷。據聞該黨副主席蔡耀昌多年來未能上位，加上因為幫新移民爭取申請綜援毋須居港七年一事而被「本土派」批評，所以令佢萌生退意，都唔打算連任副主席。蔡耀昌就話，自己未有決定，又話如果有更合適嘅人出選，佢都會支持對方喎。