教育局局長吳克儉（吳得掂）同常秘謝凌潔貞不和傳聞似乎有升級迹象，我哋前日報道過兩人有幾不滿對方，點知話咁快就應驗咗。話說吳得掂正外訪德國同瑞士了解職業教育制度，有排都未返，而政府就宣布周四出發到廣州嘅粵港合作聯席會議嘅官員，包括教育局副局長楊潤雄。點知宣布事隔兩小時多啲，政府再出稿更正，話楊潤雄會留守香港，改派教育局副秘書長盧世雄赴粵喎。
謝凌潔貞同吳得掂不和嘅傳聞，早已遍布官場，最主流講法話謝凌潔貞不滿吳得掂周圍外訪，留得佢一人孤軍作戰。現時吳得掂身處歐洲歎世界，尋日政府又話楊潤雄都會北上廣州，搞到成個教育局無晒問責官員。
結果政府罕有地喺短短兩個半小時內，急急出稿更正，話出發到廣州嘅代表團名單有更新，但其實只係一個調動，就係由教育局副秘盧世雄赴會，楊潤雄則留港署理教育局局長一職。唔通謝凌潔貞不滿兩位局長走晒去，所以提出抗議？
其實今次都幾奇怪，如果真係正、副局長都離港，咁邊個署理局長職務呢？