政情：泛民建制 民望跌得甘
佔領行動進入膠着狀態，留守者似乎打算長期抗爭，學聯計劃秘密赴京表達意見，而泛民就費盡周章諗退場機制，建制派亦花盡心思反對佔領行動。呢個大混戰格局都差唔多維持咗成個月，最新一輪香港大學民意調查就顯示，除咗學聯首度打入十大政團及成為榜首外，泛民主派、建制派或中間派嘅評分都大跌，盡失民心。睇嚟一場佔領行動，已經令各黨派變成大輸家。
市民兩邊都唔幫？
明年即將舉行區議會選舉，後年更係立法會選舉，兩場大戰如箭在弦，唔少泛民同建制都開始部署選舉，及盤算究竟從佔領行動中得失多少。從最新一輪港大民調可以發現少少端倪，港大在十月十三至二十三日分兩階段進行調查，分別訪問咗過千名市民，調查各黨支持度，結果令人大吃一驚，十大入圍政團中，九個政團得分都錄得下跌。
跌幅最大係公民黨、民主黨，分別跌九點四分同八點八分，某程度上證明咗部分市民開始離棄呢兩大泛民黨派；其次係工黨，跌咗八點七分；而社民連及人民力量亦分別下跌七點九分及六點九分。不過，建制派亦唔好得去邊，其中以新民黨跌幅最大，下跌八點三分；工聯會同自由黨都分別跌咗八點二分及七點九分；建制派「重磅股」如民建聯亦要插水，跌幅為六點二分。
由於大家齊齊失分，所以排名變動不大。今次嘅調查結果，究竟係反映支持及反對佔領行動嘅受訪者各相若吖？抑或係市民兩邊都唔幫呢？不過，唯一逆市反升嘅政團就係學聯，學聯過往由於認知率唔高，甚少打入港大民調嘅十大政團，點知今次彈出，平均得分有四十七點七分，位列眾政團之首。不過由於學聯未有記錄上次得分，所以睇唔到支持度升定跌。
學民思潮亦失分
同樣係學生團體嘅學民思潮，平均得分都錄得下跌，但由於跌幅只有四點一分，進佔十大政團第五位。從今次調查結果睇嚟，泛民同建制都係呢場佔領行動嘅大輸家，就算學聯成功突圍而出，亦唔代表泛民黨派可以受惠，所以泛民再唔檢討本身嘅定位，睇怕未來兩年選舉真係凍過水。