中環出更：誤報學歷 郭偉強：助理寫錯
勞工界立法會議員郭偉強○九年開始在香港理工大學修讀社會政策及行政學士課程，上星期終於畢業，佢嘅助理急不及待幫佢向立法會更新學歷資料。不過有自稱郭偉強同學嘅人爆料，話郭誤報學歷，又話佢呢幾年都係「hea讀書」，仲要助理幫佢搵資料做功課。郭偉強解釋，相信係助理一時寫錯，又話自己讀書「有血有汗」，叫爆料人咪亂講。
該名用化名嘅爆料人話，郭偉強在立法會申報學歷為「社會政策及公共行政學士」，而理大係冇呢一科嘅，質疑郭連自己讀咩都唔知。卓妮睇番立法會網頁資料，郭偉強議員資料嘅中文版的確寫多咗「公共」兩個字，但英文版就冇錯。郭偉強話，其實佢讀嘅都同政府運作、公共行政有關，可能助理聽得多，所以寫錯咗啫，但佢都承認自己應該小心覆核，唔會怪助理喎。
否認「hea讀」指控
佢又話，自己兼讀呢幾年體會到兼顧工作與學業係好吃力嘅事。雖然工作忙碌，但寫論文、做功課、搵資料，甚至借書都係一手一腳，冇搵助理幫手，仲話如果爆料人講嘅係真，就唔怕用真名講喎。
卓妮