中環出更：郭位「快招」助城大籌款
早前有本地建築公司因為不滿大學生參與佔領行動，斷然決定終止贊助於多所大專院校設立的獎學金，引起社會一番爭論。雖然香港城市大學（城大）未受影響，但似乎都擔心有機構或贊助人會縮沙唔贊助。日前城大於灣仔會展舉辦三十周年校慶晚宴，校長郭位即場搵到幾個贊助人之後，就立即上台將收到嘅贊助人卡片騷畀大家睇，笑笑口話講完冇得唔算數喎，認真新招。
當晚城大就請到一眾城中名人齊齊慶祝，當中唔少仲曾經係校友添。咁多有潛質同有心為教育出一分力嘅人在身邊，校長郭位當然好識把握機會，於致辭完畢及與嘉賓敬酒後，話咁快就已經物色到幾位有意於城大提供獎學金等資助嘅好友，仲立即上台多謝佢哋對教育嘅支持，確保啲贊助實食冇黐牙，難怪郭位咁淡定。
校慶30周年 名人捧場
出席捧場的嘉賓好多，好似審計署署長孫德基、金銀業貿易場理事長張德熙、中華廠商聯合會副會長陳淑玲、前輩級歌手張德蘭與夫婿楊偉誠等。
其中香港專業及資深行政人員協會理事楊素珊（Susan）約埋幾個朋友一齊到場，見佢哋咁啱傾，原來因為曾經一齊在城大修讀過高級管理人員工商管理碩士，畢業後間中都會約埋一齊聯誼。
臨開場前，卓妮仲見到北京殘奧馬術比賽香港選手葉少康，孖住舊同學兼城大商學院客席教授陳鳳翔一齊趕至與其他校友歡聚。
講開停止向多間大學捐款嘅俊和發展集團，主席彭一庭尋日出席股東周年大會時話，撤大學捐款與引入中資合作無關，只係好關注佔領行動令大環境變壞，連累細規模公司冇好日子過，若工程屢受阻，香港難再有活力。
卓妮