九巴72A縮班 通告不足

「第二日就減班次,但我前一日都仲未見到有通告公布!」鄭先生指九巴72A線於九月中縮減班次,尾班車由晚上十一時半提早至九時十五分,九巴未有於站內張貼通告,「好彩我喺社交網站見到有人講,如果唔係就等到天光都冇車!」

九巴發言人表示,有關提早尾班車班次事宜已於總站及分站張貼通告,並於網頁及應用程式通知乘客,巴士站路線資料內亦有提及有關改動。

搭客倡於車門張貼

不過,鄭先生對九巴的回應卻深表質疑,「我肯定佢唔係個個站都有貼通告,至少我之前喺海福花園個站就見唔到!」鄭認為,九巴應在每個巴士站均貼通告,又建議可於巴士車門張貼通告及於車廂廣播有關消息,以確保乘客能知悉有關安排,「就算網上有通知都好,但有啲長者根本唔識上網,如果站頭都唔貼通告,佢哋又點知?」

(ireport_00038573)

第一手消息請下載on.cc東網iPhone/iPad/Android/Windows Phone Apps