風水輪流轉，一啲冇講錯o架。曾幾何時，內地尖子對香港嘅大學趨之若鶩，可惜今時唔同往日，內地飛速發展，香港停滯不前，此消彼長之下，本港精英掉番轉爭入內地名牌大學，諗落都幾唏噓。
唔係功夫茶亂噏o架。國家教育部日前聯同香港教育局舉辦內地高等教育展，七十八間參與明年「免試招收香港學生計劃」嘅內地院校擺攤位，吸引大批應屆文憑試考生同家長入場，場面認真墟冚。講番呢個計劃，自一一年實行至今，已經吸引超過九千七百名學生報名，淨係今年就收到近四千個申請，比舊年大增三成，絕對可以用「爭崩頭」嚟形容。不過咁，你想入都要人哋肯收至得，北大、清華等名校已經將收生標準調高至六科達4級，而個別學科更要求中、英文須達5級添。
點解內地高校愈來愈受港生歡迎，咪因為本地學額僧多粥少，好多後生仔冇書讀囉。講起都羞家，本港大專入學率過去廿五年一直停留喺一成八左右，同好多第三世界國家差唔多，今年就有六萬學生望大學校門興嘆，呢支求學大軍陣容龐大，真係唔講得笑o架。
可能大家會問︰留學有好多地方選擇，點解咁多人對內地情有獨鍾？好簡單啫，喺內地讀大學特別係重點大學嘅，唔少都係猛料之人，貴子弟成功入讀，隔籬同學仔分分鐘係官二代、富二代，一早建立好人脈關係，泊定個好碼頭，點都有好處。再講吖，家陣內地咁多發展機會，年輕人學好普通話，熟悉內地文化，第時北上大展拳腳都事半功倍啦。
好嘞，即使唔從功利角度出發，睇吓近年內地高校無論喺師資、研究成果以至國際排名，都有好大進步，受家長同學歡迎一啲都唔出奇。反觀本港專上教育，好似王小二過年，一年不如一年，第樣唔講，淨係講科研經費，全港大學一年嘅總投入比唔上內地一間大學，本港大學國際排名跌跌不休，唔係無原因嘅。
最慘嘅係，屋漏偏逢連夜雨，大學教育本來已經問題多多o架啦，偏偏社會泛政治化、凡事訴諸街頭抗爭嘅風氣近年入侵校園，甚至發展到大學教授煽動學生參加乜鬼佔領行動，搞到個個醉心政治，淪為港產紅衞兵。難怪最近好多家長提早送仔女負笈海外升學啦，又係嘅，試問邊個父母想仔女有書唔讀，終日瞓街搞抗爭吖？
即係咁，有條件嘅家庭爭相供仔女去外國讀書，條件差啲嘅咪去內地升學囉。至於被迫留低嘅，一係接受劣質教育，再唔係就將青春奉獻街頭，你哋話嘞，香港點留得低精英人才吖。