政情：「鑌」走台中為保育取經

立法會十月復會至今約一個月左右，立法會議員陳恒鑌（Ben）早兩日就決定放自己幾日假，但唔係去遊山玩水，而係趁機到台中向當地文化保育取經。阿Ben尋日喺社交網站上載幾張用磚頭砌成嘅舊式建築物，原來呢個建築物係歷史悠久嘅衞生院，但當地政府活化後變成一個充滿藝術氛圍嘅地方，吸引唔少當地年輕人進駐賣紀念品同雪糕。佢又讚嘆，台灣方面近年鼓勵各地致力活化舊建築，為當地注入新動力，值得香港政府多加借鏡。