佔領人士持續佔據金鐘政府總部及立法會附近道路，雖然警方早前已經開通添華道同龍和道，令政府官員可以乘座駕返工，但立法會議員仍然唔可以揸車入立會。據聞有建制派議員投訴，由於行入立法會嘅路面不時有大批佔領人士聚集，當佔領人士一見到建制派議員經過，就會起哄指罵佢哋，因此曾要求立法會秘書長陳維安幫手游說行政署開放「秘道」，等佢哋可以循政總停車場入立法會，避過示威者指罵。
不過，據聞行政署擔心一旦開放政總停車場畀議員自由出入，可能會重演今年六月財務委員會審議新界東北發展前期工程撥款期間，有泛民議員助理堵塞立法會停車場，唔畀其他議員離開立法會嘅情況。最後行政署思前想後，都係唔肯向議員開放政總停車場，議員惟有另謀對策，偷雞喺中信大廈附近馬路泊車，方便佢哋進出立法會。