政情：難忍吳得掂 常秘「出局」

局長關鍵時刻冇影

吳得掂前年七月上任教育局局長，由一○年十二月開始出任教育局常秘嘅謝太輔助，原本以為一新一舊嘅配搭可以互補不足，不過唔使幾耐，已經傳出二人唔咬弦。

其中吳得掂處理政治炸彈嘅能力更係不言而喻，喺前年反國教一役已充分顯示。至於謝太性格強悍，有傳佢非常不滿吳得掂成日借考察為名周圍飛，變相留低爛攤子要佢執手尾。

舉例指，大專生於九月下旬發起罷課，吳得掂就揀正呢個關鍵時刻放大假，搞到謝太要忙於撲火。及至尋日教育局又出稿，指吳得掂今日會率領教育代表團到德國同瑞士訪問五日，了解當地職業教育制度，謝太要再次留港打點局內事務。或者救得火多都有爆發嘅一日，有傳謝太終於向公務員事務局提出調職要求，間接以行動表示頂唔順吳得掂，局方見佢喺教育局已做咗將滿四年，於是積極為佢物色新歸宿。

傳謝太調職恐觸礁

據悉當局最近向三個政策局「探路」，睇吓以上三個政策局原有嘅常秘有無興趣，或者「夠鐘」調職未，其中一個政策局更有高民望嘅局長領軍。聞說謝太本身對新目的地無乜意見，但三個榜上有名嘅政策局就非常頭痛，有人更即時耍手擰頭。

有官場中人擔心，謝太一旦真係調咗過去，可能會將爭議風波帶埋去新嘅政策局，到時局長有幾高民望都無用，根本唔係一時三刻就可以解決問題。究竟謝太花落誰家，吳得掂又會否有新常秘輔助「拆彈」，有關方面要好好諗吓兩全其美之策嘞！