中環出更：詩姑中環等的士被截胡
佔領行動持續超過一個月，唔少要喺佔領區附近返工返學嘅市民都受影響，勢估唔到連基本法委員會副主任梁愛詩（詩姑）亦疑身受其害。話說卓妮尋日下午喺中環一帶，撞見詩姑一臉愁容，眉頭深鎖咁企喺度，原來平時慣以的士代步嘅佢，一直等緊一架的士去下一個目的地，但似乎詩姑成功率唔高，截咗一陣都截唔到，仲一度畀人截胡添。
詩姑本來一直喺皇后大道中東行線等緊的士，但唔知係咪見等咗好耐都唔成功，加上眼見對面線有好多的士經過，向來醒目嘅詩姑即時行過去對面截車，點知對面已經有唔少人等緊的士，錯失先機嘅詩姑惟有繼續耐心等待。
可能詩姑一手拎住袋戰利品，另一隻手就拎住手袋，截的士時隻手舉得唔高，搞到唔少的士都直行直過，其中一架的士一度停正喺佢面前，但都畀其他人截胡率先上車，好彩當時唔算係繁忙時間，最終詩姑前後等咗三架車、約十分鐘左右先至上到車。
卓妮