中環出更：小母牛慈善賽 杜擴業愈跑愈有
每年一度嘅「小母牛競步善行」尋日喺大埔大尾篤舉行，好多政商界人士為做善事都不遺餘力，其中小母牛香港分會籌款委員會主席、「快勞夾大王」杜振源，雖然無份落場跑，由囝囝杜擴業落場應戰，期間仲發生一個小插曲。話說杜擴業原先報名參加十公里賽，點知同場仲有其他田徑團體舉行半馬賽事，杜擴業只係顧住向前跑，無留意跑錯路程，因此意外地跑咗人生第一次半馬，好彩佢最尾體力都足以應付到。
政商一家大細撐場
同樣一家大細現身支持，有小母牛香港分會主席梁錦松、副主席葉樹堃（Stephen）及籌款委員會副主席王庭聰等人，其中梁錦松帶埋兩位囝囝到場，一齊參與三公里親子賽；Stephen則同平時有跑開步嘅細仔葉瀚華（Ian）出席親子賽。Ian話，成段路程最辛苦一定係上落斜嗰段，少啲體力都應付唔嚟。
今年加入小母牛香港分會大家庭、籌款委員會委員羅詠詩亦同老公、囝囝齊齊支持活動，佢仲預告一家人遲啲會參加小母牛喺內地搞嘅扶貧探訪活動，順便畀囝囝體驗生活喎。
講番今年嘅籌款成績，該會一共籌到二百五十萬元，而第一次舉辦十公里長跑賽亦吸引九百多人參加，由此證明本港仲有唔少人為善不甘後人。
卓妮