香港地少車多，出名泊車難，好似旺角咁吖，莫講話佔領運動霸佔道路，就算係平時，想搵個車位一啲都唔易0架。當然喇，凡事都有例外，喺人頭湧湧嘅女人街，就有個荒廢咗三十五年嘅「隱世停車場」，你聽過未吖？
呢個「隱世停車場」位於奶路臣街同通菜街交界一幢大廈，其中四層係停車場，喺行人專用區側邊，大家平時行街一定經過，但就未必知道呢個停車場得個睇字。原來，呢個停車場之所以長期荒廢，背後有段古︰話說該廈建於上世紀七十年代，發展商為滿足區內泊車需求，預留四層做停車場，點知因為資金不足遲咗落成，咁啱當時旺角落實設立小販認可區，結果大廈落成後，出入口被小販堵塞，停車場根本用唔到。
大家可能以為問題好易解決啫，一係清除停車場入口障礙物，一係容許停車場轉作其他用途，點會拖足三十幾年仲未解決0架。嗱，問題咪出喺負責規劃嘅屋宇署同地政總署身上囉，業主多年來一直申請改變停車場用途，點知當局闊佬懶理，不置可否，反而屋宇署喺○三年單方面批准停車場入口加設商舖，甚至加上禁止使用車輛進出口嘅條款，於是咪搞成依家呢個荒謬局面囉。
係人都知，旺角係黃金地帶，寸土尺金，家陣因為政府部門敷衍塞責，缺乏溝通，業主眼白白睇住物業丟空養蚊，見財化水不特止，停車場得物無所用，物業無法投保，令大廈風險增加，你話係咪多得港產官僚唔少吖。
講開又講，港府規劃一向甩漏多多，烏龍百出，今次事涉私人土地，養蚊又好，養草又好，固然貴客自理，即使係發展官地，港產官僚同樣係拖拖拉拉，決而不行。好似銅鑼灣加路連山道機電署前總部地皮咁吖，估值超過百億元，經過研究復研究，先至決定重新發展，點知拖足十幾年仲係無影無蹤，最近當局仲話要評估交通影響，擱置計劃添。又例如灣仔入境事務大樓同稅務大樓等三幢政府建築物咁吖，成日話搬，到依家都係紙上談兵，唔知拖到幾時至落實。至於嗰啲地點優越、以賤價批畀私人會所嘅官地，直頭係暴殄天物添啦。
所以話啫，港府身為最大地主，手上有大把土地唔識好好利用，反而口口聲聲寸土必爭，見縫插針，唔怪得被譏為「盲搶地」喇。嗱，佔領運動霸路，阻住地球轉，固然神憎鬼厭，而官僚霸住個位唔做嘢，得過且過，咪一樣係不知所謂！