大家有冇聽過，打工仔因為搭車難而要放棄筍工？唔係講笑㗎，住喺新界西北嘅居民，隨時要面對咁痛苦嘅抉擇，除非日日做沙甸魚喇。
係咁嘅，有位家住屯門嘅居民，原本分別喺港島同沙田搵到收入理想嘅職位，可惜因為交通轉折，時間太長，最後焗住放棄，只好搵同區收入較低嘅工作。就算係咁，每日返工都要花半個鐘，有時甚至因為乘客太多而上唔到車添。見微知著，類似例子相當普遍，簡直係打工仔悲歌。
唉，冇計喇，港府規劃交通配套短視，冇充分考慮區內人口急速膨脹，導致新界西北交通網絡不勝負荷。當局早前公布最新鐵路發展藍圖，提出七個鐵路項目，包括增建西鐵線洪水橋站同屯門南站，但就將討論咗好多年嘅屯門至荃灣沿海鐵路擱置，引起居民極度不滿。正如有人質疑，新界西北交通網絡已近飽和，而人口仍不斷增加，再唔增加交通設施，遲早爆煲嘅咋。
嗱，本報記者連日直擊元朗同屯門公共交通工具嘅擠迫情況，「墟冚」兩個字就講晒。可以見到，上班高峰期西鐵站人山人海，打晒蛇餅，月台上每道車門平均有二十幾人等候。中途站情況更嚴重，列車到站已經爆晒棚，乘客經常要等幾班車至有機會逼上去。唔講唔知，西鐵繁忙路段載客量居然達到百分之九十九，問你點頂！
巴士亦唔好得去邊，元朗大馬路一帶巴士站，出市區嘅乘客人龍閒閒地過百人，少啲耐性都唔掂。有乘客投訴，巴士重組令交通更唔方便，每日要用多廿分鐘出市區返工，唔谷氣就假。
交通網絡承載能力已近飽和，加上區內人口仍不斷增加，簡直係雪上加霜。未來三年，新界西北會有一萬一千多個公營房屋單位落成，仲未計私人住宅㗎，到時區內人口將增加到一百二十萬，公共交通運輸壓力有幾大，唔使講都知喇。
係呢，新界西北搭車難唔係一朝一夕嘅事，當局究竟有冇諗辦法解決？運輸署話會繼續密切觀察喎，講咗等於冇講。話時話，當局其實大把嘢做，除咗重新評估沿海鐵路可行性之外，更可以採取治本措施，喺發展新市鎮嘅同時，透過增建工業區或商業區，提高區內就業機會，咁咪可以減輕交通網絡嘅壓力囉。正所謂，只要思想不滑坡，辦法總比困難多，一切事在人為，港產官僚得過且過，敷衍了事，梗係乜都做唔到喇。咪話功夫茶唔提醒吖，天水圍已經充滿悲情，唔通港府想成個新界西北都變成悲情城市咩！