學聯及學民思潮都擺泛民主派立法會議員上枱，呼籲泛民議員發動五區總辭或超級區議員辭職搞變相公投，但有機會成為港島區議員辭職人選嘅公民黨議員陳家洛似乎就聞辭職色變。佢尋日回應辭職變相公投時，一時就話超級區議會界別嘅議員辭職好過五個地方選區嘅議員辭職，一時又話要確保議會內泛民有關鍵否決權喎。如果真係五區各搵一名議員總辭，咁陳家洛嘅議員生涯做唔夠一屆就玩完，相反如果由超級區議員辭職發動變相公投，佢咪唔使擔心要辭職囉，估唔到佢卸膊縮骨仲快過縮骨遮呀！
