佔領行動逾一個月，示威者仍佔領金鐘、銅鑼灣及旺角三區主要幹道。其實喺佔領初期，坊間曾傳出示威者會佔領三區以外嘅區域，其中有人嘗試佔領觀塘港鐵站附近嘅迴旋處，包括開源道等繁忙道路，搞到警方非常緊張。點知示威者最後發現佔領人丁單薄，只得十數人參與，佔領計劃失敗收場。據知班示威者最後佔唔成觀塘，就走去「佔領麥當勞」，食飽肚後散水，都咪話唔夠戲劇性！
有熟悉觀塘區嘅人士話，就算有示威者佔領觀塘，佢哋都有辦法解決，唔使動用一分警力。咁犀利？因為一旦有人佔領觀塘，就會得罪兩班人，包括喺觀塘經營紅色小巴線嘅司機，呢班人行事非常團結，唔會畀任何人亂嚟；另外一班就係工廠佬，就算觀塘近年轉型開設唔少商廈，但仍然有好多人喺工廠打工，所以呢兩班人自發清場行動確係唔嘢少。如果佔領者得罪佢哋，好可能自討苦吃。