政情：自由黨地震 勢遭挖角
原自由黨黨魁、立法會議員田北俊（田少）因為叫特首考慮辭職，最終搞到被「搣柴」褫奪全國政協委員資格，並辭去黨魁一職，避免禍及成個黨。正當該黨物色黨魁人選之際，多個獲中央祝福而路線相近嘅建制派政黨，好似新民黨及經民聯，近日紛紛覬覦自由黨內有潛質嘅黨員，尋日新民黨主席葉劉淑儀仲打晒開口牌，睇嚟一場政黨大洗牌在所難免。
難再做「壞孩子」
自由黨以至政協常委都引述話「搣柴」一事只係針對田少，唔會影響該黨。不過，該黨一向予人感覺都係建制派內嘅「壞孩子」，凡事與政府作對，目的係想喺功能界別以外同時爭取直選議席，結果搞到兩面不是人。不過，現時中央以強硬手段喺短時間內處理田少事件，該黨要繼續走「壞孩子」呢條路線，前景就未必咁樂觀喇。
相反，新民黨銳意行中產專業路線，副主席田北辰當年仲係喺自由黨過檔。葉太尋日喺電台節目打開口牌話，該黨同自由黨部分黨員及支持者背景相似並且友好，雙方一直有來往，唔排除有人因為近日田少「搣柴」事件轉投佢哋陣營。不過，事後我哋再追問近日有冇人真係表達轉黨意向，葉太就唔肯多講喇。
有新民黨中人話，最近都有自由黨黨員及區議員主動接觸，聲言有興趣過檔，雙方仍在商討之中，最近例子就係去年元朗區區議員陳思靜由自由黨轉去新民黨。加上今年九月新民黨訪京團，都有自由黨中常委隨團，所以新民黨對自由黨中人虎視眈眈並非空穴來風。
「留低都係死士」
至於由自由黨分裂出來嘅工商背景政黨經民聯，相信更加係自由黨黨員另一出路。講到挖角潮，經民聯副主席林健鋒就認為現階段唔使咁急，似乎係謀定而後動。盛傳有機會接任自由黨黨魁嘅紡織及製衣界議員鍾國斌就好淡定話，要走嘅黨員都走晒，仲講笑話留低嘅黨員全部都係「死士」，大有「置諸死地而後生」嘅感覺。