有人話，想知道一個地方嘅競爭力，睇吓大學辦成點就知，真係冇講錯o架。本港大學教學質素每況愈下，師資濫竽充數，訓練出嚟嘅「精英」，將來點同人爭吖。
嗱，唔係危言聳聽o架。有大學最近對超過百名教研人員進行評核，了解佢哋喺教學、研究同服務三方面嘅表現，結果竟然超過三十人唔達標。根據校方規定，唔達標嘅將獲一年離任通知，亦即係話，該大學未來一年將會出現大型教研人員換血潮，都咪話唔得人驚。
咪以為只係樹大有枯枝，族大有乞兒呀，呢間大學係咁，其他大學亦都唔好得去邊嘅咋。名師出高徒，劣師出笑話，依家啲大學畢業生中不成，英不就，有啲甚至連見工都要家長陪同壯膽，簡直笑大人個口。學生表現如此，師表難辭其咎，本港高校國際排名跌跌不休，上述調查反映嘅問題可能只係冰山一角咋。
講到庸師誤人子弟，眼前就有現成例子。佔領行動吸引大批傳媒採訪，唔少學生領袖經常喺鏡頭前慷慨陳詞，顧盼自雄，但每當有記者用英文提問嘅時候，佢哋唔係O晒嘴面露難色，就係向周圍嘅人班救兵。好多人睇到呢啲鏡頭都搖頭嘆息，與其將青春奉獻畀街頭，點解唔把握時間，用知識裝備自己呢？
冇錯喇，大學教育之所以問題多多，除咗因為教師質素成疑，亦因為政治入侵校園。唔係咩，佔中搞手有唔少係學者，有啲仲係法律學者添，佢哋自己知法犯法不特止，仲以乜鬼「公民抗命」為由，公然號召學生霸佔街道，結果好多人被佢哋呃咗，犯咗法都唔知，你話係咪害人不淺吖。
大學係咁，中小學甚至幼稚園亦唔能夠幸免。最近有幼稚園教師到佔領區現場教學，向年幼學生灌輸「警察係壞人」嘅訊息，鼓吹仇恨，可憐幼小心靈就咁被污染，第時大個容乜易習非成是，郁吓就挑戰法律，郁吓就鬧爆警方o架，呢啲老師點止教壞細路，直頭係禍港殃民呀！
當然啦，校園政治化成咁，某程度都係港府自己攞嚟嘅。港府年前設立通識教育科，原本希望培養學生多角度獨立思考，點知當局放任自流，通識科逐漸異化為政治洗腦科，就講今次佔領行動，之前就有團體被踢爆夾帶私貨，炮製撐佔中嘅通識科教材。傳聞當局計劃削減涉及香港政治嘅相關內容，有冇遲啲吖。
即係咁，佔領行動搞到天怒人怨，「還路於民」呼聲一浪高過一浪。計功夫茶話齋，「還路於民」固然刻不容緩，「還我校園」，掃除政治污染一樣咁重要o架！