政情：泛民「不合作」齋噏
因應近日嘅政改爭議同佔領行動，泛民主派在立法會內發起不合作運動，除咗杯葛政改第二階段諮詢外，亦會全力阻撓民生議題以外嘅撥款申請。不過，對於港府近日開始為明年初發表嘅施政報告及財政預算案展開諮詢工作，泛民竟然去信要求特首梁振英（CY）及財政司司長曾俊華（鬍鬚曾）去立法會同所有泛民議員會面，講咗「不合作」但又要見官員，十足跳草裙舞扭扭擰擰，唔知想點。
每年在發表施政報告同財政預算案前三至四個月，政府都會開始為兩份報告進行民間諮詢，CY同鬍鬚曾更會同立法會各政黨及不同團體會面，當面聽取意見。今年施政報告同財政預算案諮詢工作由本月中展開，當中民建聯就打頭陣成為首個去特首辦同CY及鬍鬚曾會面嘅政黨，而其他建制派亦會陸續在下月同兩人會面，要求在兩份報告中加入各項利民紓困、扶助中小企嘅措施。
改為一次過晤23議員
雖然泛民黨派每年都會循例同CY及鬍鬚曾會面，提出取消功能界別、推行全民退休保障等訴求。不過，適逢今年泛民發起不合作運動，企圖拖垮政府施政，有政界中人就預計泛民今年會順勢宣布擱置同政府會面，以示不滿當局連日處理佔領行動嘅手法。不過，上周泛民飯盒會開會，竟然反高潮地決定今年如常同特首及鬍鬚曾會面，但就由以前各黨逐一會面改為大圍一齊見。
有泛民中人透露，由於各黨覺得往年一小時會面時間太短，於是就叫飯盒會召集人梁家傑去信特首辦，要求CY同鬍鬚曾一次過見晒二十三位飯盒會議員，等佢哋可以齊齊表達對來年施政報告及財政預算案嘅訴求。
要求特首赴立會見面
至於會面地點，平時CY同鬍鬚曾都會喺特首辦或政府總部接見各黨派，但泛民今年就獅子開大口，要求兩人親自去立法會同佢哋會面，以示有關當局對立法會嘅尊重。泛民呢頭高調向政府宣戰，企圖迫使當局回應民間對真普選訴求，嗰頭又話要同政府反映對未來施政嘅意見，究竟佢哋知唔知自己想點呢？