中環出更：高佬賢：堵路累漁民收入插水
最近有不同業界代表都陸續發聲，指佔領行動對佢哋造成好大影響，例如運輸團體批評佔領人士阻塞要道，搞到職業司機做唔到生意；飲食業就話生意額暴跌，分分鐘減薪、裁員，甚至執笠。
唔單止咁，原來佔領影響已經由陸地蔓延至海上，漁農界立法會議員何俊賢（高佬賢）尋日就提到，唔少業界人士因為佔領區堵路而出唔到貨，得番三、四成生意。
需求減 出貨難
高佬賢話，受佔領行動影響，三條主要過海隧道經常塞車，漁民由香港仔運貨出市區非常不便，加上運送時間耐咗，海鮮已經冇咁新鮮，無論價錢同供貨量都大打折扣。
另外，漁民有唔少貨都係運去港島區嘅酒店及酒樓，呢啲食肆亦因為生意額下跌，唔會再好似以前咁要咁多貨，漁家嘅收入自然大不如前，佢哋惟有自己搵多啲渠道出貨。
家住元朗嘅高佬賢平時出入都靠揸車，佢話近期都搭多咗交通工具，而且冇咩事都唔會出去旺角食飯。適逢尋晚高佬賢堂姐在旺角擺酒，佢話呢啲情況就避無可避嘞。
卓妮