中環出更：少年張炳良讀華仁搞搞震
老牌名校香港及九龍華仁書院尋日舉行校慶步行籌款，多位名人校友齊出席捧場。作為港華校友嘅運輸及房屋局局長張炳良主禮致辭時大爆陳年往事，話當年讀書唔算強，皆因鍾意「搞搞震」，校內外活動乜都搞一餐，最記得擔任校內輔祭（Altar boy），皆因貪個位有免費早餐券，仲有逢周五逐班拍門叫同學仔告解，變相唔使上堂，認真開心咁話。
不過，張炳良都唔係只識走堂，事關佢在六四年升讀港華中一之前，靜靜雞報讀港華嘅小六夜校，希望操好啲英文，非常勤力，難怪日後成為大學學者，仲做埋教育學院校長添！
講到持續近一個月嘅佔領行動，對年輕人造成極大思想衝擊，畢業已四十幾年嘅張炳良不忘用華仁校訓提醒師弟，話創辦兩間華仁嘅耶穌會，宗旨係「育人事主」，強調自由思考及明辨道理，依家香港處於大時代嘅關鍵時刻，呢啲價值更加重要，希望咁多位師弟多思考、多關懷社會。
校慶嘉賓粒粒皆星
至於另一位港華名人校友，就係衞生防護中心前總監曾浩輝嘞，自從佢兩年前引退後，大家都好關心佢嘅去向，佢笑言依家係自由身，除咗幫手籌備校慶晚宴同教會分享會，亦不時返大學兼職講書，生活比以前輕鬆得多！佢又自爆八五年港華中七畢業，計番條數比張炳良局長細成二十年咁滯，在學時無緣遇上呢位大師兄喎。
香港華仁與九龍華仁今年分別慶祝九十五周年及九十周年，尋日搞校慶步行籌款，過千名舊生帶同一家大細捧場，而出席起步禮嘅舊生更粒粒皆星，包括立法會批發及零售界議員方剛、醫院管理局前行政總裁何兆煒、心臟科名醫謝德富等，仲有天主教香港教區主教湯漢。
卓妮