政情：學聯叫總辭 泛民驚輸凸

換班不成全軍盡墨

其實學民思潮早喺今年初已經提出五區辭職公投，而因衝擊遞補機制論壇被判囚四周嘅立法會議員梁國雄（長毛）七月一出冊後，亦揚言要發起總辭，不過泛民一直都對總辭有保留，驚分分鐘賠了夫人又折兵。

首先隨着佔領行動持續近一個月，唔少民調顯示市民十分反感，泛民嘅區議員更加成為街坊投訴對象，唔少泛民都開始想縮沙，依家叫佢哋辭職咁激，真係唔知邊個選民會再吼佢。此外，現任泛民議員一旦辭職就要提名新人選參選，萬一建制派喺補選時發功，全力部署奪取議席，泛民未必可以攞番晒五個議席，到時政改方案要過關就易好多啦！

可能有人會話，泛民可以透過總辭畀各黨內嘅第二梯隊上位，聽落好似幾啱，但如果要同建制派對撼，好可能換班不成變「自殺」。當然，另一方法係順勢推舉學聯中人參加補選，博取選民支持，不過咁做即係叫泛民讓位之餘，仲要幫學聯抬轎，相信佢哋都唔會肯作出咁大犧牲。綜合以上分析，五區總辭對泛民真係百害無一利。難怪學民思潮同長毛幾個月前提出之後，就冇咗下文。

電子公投疑玩即興

講開又講，佔中三子及學聯發起喺佔領區進行電子公投，畀市民就公民提名同要求人大常委會撤回政改決定表達意見。據悉泛民事前都冇詳細傾過公投所設嘅兩個議題，有人質疑字眼過激，唔知係咪又有人玩即興呢？