香港近年發展緩慢，固然因為社會日趨政治化，政客為反對而反對，阻住地球轉，而政府做嘢拖拖拉拉，敷衍塞責，一樣難辭其咎嘅咋。呢，銅鑼灣地王加路連山道機電署前總部地皮重新發展計劃拖足十幾年，隨時泡湯，你話係咪笑話吖。
係咁嘅，港府早喺九九年決定騰出機電署總部地皮重新發展，之後更加將鄰近嘅兩個私人會所地皮合併發展，增加地皮面積。呢塊市區罕有靚地估計值百幾億元，如果推出市場拍賣，既可以增加寫字樓供應，又可以增加庫房收入，一舉兩得，可惜好事多磨，淨係機電署搬去九龍灣都搞咗五六年，計埋當局物色地方搬遷鄰近總部嘅車輛維修部，蹉蹉跎跎超過十年。
好嘞，家陣用地問題解決，至於收回鄰近嘅私人會所土地，只要三個月提前通知就得，以為水到渠成啦，點知規劃署去年底研究後發現，地皮改用途後會令區內人流車流大幅增加，車龍隨時塞爆香港仔隧道。所以咯喎，當局一方面話會重新評估並探討解決辦法，另一方面就放風話附近有高樓大廈，好難擴闊道路喎。咁即係點吖？即係搞嚟搞去又係得個吉囉。
古人教落，凡事豫則立，不豫則廢。相關計劃提出十幾年，當局早就應該進行評估，及早完善周邊道路配套，依家至發現可能造成大塞車，仲有冇再後知後覺啲吖。正如有地區人士話齋，區議會早就建議當局將地下發展為交通交匯處，並興建行人隧道接駁銅鑼灣港鐵站，疏導地面人流，點知當局好似借咗聾耳陳隻耳咁，搞到地王長期丟空養蚊，簡直係浪費公帑。
真係諗極都唔明，好似三堆一爐、機場第三條跑道等大型基建項目，就話有環保團體反對，有政客從中阻撓，寸步難行啫，重新發展機電署舊總部爭議唔大，地區人士更加係舉腳贊成，港產官僚咁都搞到一鑊泡，真係唔到你唔服。
講開又講，港府開口埋口寸土必爭，見縫插針，其實自己就係最大地主，使乜捨近求遠吖。好似灣仔入境事務大樓同稅務大樓等三幢政府建築咁吖，位處市區黃金地段，飽覽維港美景，當局六年前決定將三幢大樓搬離灣仔，騰出地皮起甲級寫字樓，到依家仲係只聞樓梯響。更離譜嘅係，唔少地點優越嘅官地以賤價批畀私人會所，只供少數權貴享樂，講得好聽係暴殄天物，講得難聽直頭係嫌貧愛富，與民為敵。
正所謂，一節見則百節知，港產官僚連發展官地咁簡單嘅嘢都拖拖拉拉，甩甩漏漏，旨意佢哋解決佔中鬧劇，盞嘥氣喇！