政情：廖偉麟指佔區爆舖災
佔領行動持續將近一個月，對唔同行業嘅影響各有深淺。紀惠集團副主席廖偉麟（Jeffrey）旗下有唔少甲級寫字樓，部分更係位於佔領區域，但佢估計，除非佔領行動持續超過多個月，否則對寫字樓租務方面應該影響不大。
商場「劏場」亦受害
佢解釋，雖然好多寫字樓都係位於佔領區，但寫字樓多數係長期合約，所以影響相對較低，反而地舖及商場「劏場」嘅影響就嚴重得多喇。
Jeffrey話，如果地舖生意太差，商戶有機會完咗合約就停止再租，或者有啲生意一般嘅商戶，即使無要求減租，亦可能需要免兩、三個月租去吸引佢哋續約，另商場「劏場」嘅經營就最為困難。住宅方面，近日有指二手樓成交量先淡靜後回升，部分樓價更有上升趨勢。
Jeffrey就認為，一手住宅尤其一線豪宅嘅交投量理應不受影響，反而二手住宅嘅交投量有機會較為淡靜。