建小蠔灣回收中心撥款通過
財務委員會尋日繼續討論撥款十五億八千九百萬，興建小蠔灣有機廚餘回收中心。泛民主派原本喺上星期會議上不斷提出休會動議，要求暫停討論有關撥款申請，但佢哋尋日就無再咁做。當人民力量陳偉業（大舊）提出休會動議時，泛民議員一個都無發言，只係喺投票時紛紛「歸位」投支持票。財委會最後以三十七票贊成、一票反對通過有關撥款申請，而公民黨三位議員更加坐定定投贊成票。
飯盒會召集人梁家傑話，飯盒會將會去信財委會主席張宇人，要求將較少爭議嘅撥款申請調前，盡快通過與民生相關嘅事項。民協馮檢基就話，由於有機廚餘回收中心係民生議題，所以唔會阻止通過。泛民之所以一時一樣，講到尾都係選票作怪啫。