政情：白鴿缺「水」押後黨慶

卿姐豪言「搞大佢」

政黨每年開支數以幾百萬元計，除咗搵「金主」「揼水」外，唔少政黨都會透過街頭籌款或舉行籌款晚宴籌錢，以應付來年開支。雖然泛民黨派唔及建制派吸金力咁強，但今年係白鴿黨創黨二十周年，該黨主席劉慧卿（卿姐）一早已經豪言話要「搞大佢」，於是一早預訂咗尖沙咀一間高級酒家，準備筵開五十席向各方好友揼心口募捐。

至於籌款金額方面，雖然白鴿黨喺去年籌款晚宴後爆出賣假畫風波，最後要向投得該畫嘅商務及經濟發展局前局長馬時亨及國畫大師黃永玉道歉兼退款，但該黨當晚依然籌到二百三十五萬，自然食過翻尋味。今年卿姐除咗繼續委任人緣極好嘅李華明出任籌款委員會主席外，仲定出六百萬元嘅籌款目標，比去年嘅三百萬元提升一倍。

該黨定出六百萬元呢個堪稱「天價」嘅籌款額，根本係個不可能完成嘅任務。據了解，雖然「賣枱」反應良好，五十圍酒席一早已經沽清，但該黨至今都只係籌到一百萬元左右，距離六百萬元仲差成一大截。知情人士透露，該黨吸金力大不如前，加上依家佔領行動鬧得熱烘烘，有心捐錢嘅人都會選擇直接捐錢畀佔領行動相關組織。

單仲偕死撐政治原因

黨團召集人單仲偕就話，該黨押後舉行晚宴完全係因為政治原因，絕對同籌款額未達標無關。佢又話，該黨現時初步籌得款項已經超過去年嘅「賣枱」金額，至於暫時籌到幾多就不便透露。不過，即使籌款成績唔錯，但現時佔領行動風頭火勢，佔領人士風餐露宿，泛民政黨都唔應該喺呢個時候搞飲宴啦，你估真係「去飲」咩！