中環出更：梁繼昌退出政制委員會
泛民主派立法會議員喺議會發起不合作運動，新立法年度群起加入掌管政府財政大權嘅財務委員會轄下兩個小組委員會及政制事務委員會。不過，政制事務委員會只係開咗兩次會，會計界議員梁繼昌（Kenneth）就決定要退出委員會喇。Kenneth解釋，佢覺得依家嘅政改係由議會外嘅抗爭做主導，議會內可做到嘅嘢係零，所以寧願退出委員會，專注議會內其他工作咁話。
嫌冇決策功能
Kenneth喺今個年度除咗要擔任人事編制委員會主席外，本身已經係環保、財經、保安及經濟發展四個事務委員會成員，而佢同時亦係帳目委員會成員，未來要參與幾個聆訊。加上Kenneth一直較專注於條例草案工作，佢話今年有意競逐至少三個條例草案委員會嘅主席，所以都預計會做到冇停手。
現時政制事務委員會已經有超過五十位議員，Kenneth話，一個事務委員會多過二十人都已經好難運作，加上委員會都冇決策功能，所以佢就決定交個波畀同屬公共專業聯盟嘅資訊科技界議員莫乃光搞掂算喇。
卓妮