一忍再忍，忍無可忍，佔中霸街阻路觸發天怒人怨，就算法庭頒布禁制令亦公然蔑視，大批市民義憤填膺，出動大鐵鉗自發清場搬路障，再一次觸發激烈街頭攻防戰。其實，政治鬥爭不斷升溫，被人為路障擋路嘅又點止街頭吖，立法會一樣被反對派騎劫，搞到工程項目嚴重延誤，浪費公帑，損害民生，破壞力比佔中鬧劇有過之而無不及0架。
立法會工務小組委員會復會後尋日首次審議工程項目，一開始就傳來壞消息。受上年度立法會拉布影響，當局本年度向委員會提交嘅八十九個工程項目中，有二十一個係上年度積壓留下嘅項目，而呢批工程平均每項延誤六個月，導致預計成本合共上升十億元。一句講晒，議會困獸鬥，公帑付東流，納稅人真係多得呢班政客唔少咯。
其實，民生工程受阻，浪費公帑已經唔係最壞情況，家陣最驚嘅係由於政府乜都做唔到，社會發展被嚴重拖慢，經濟一籌莫展，民生日漸凋敝，全港七百萬市民都係輸家。嗱，香港佛教醫院就係其中一個犧牲品，由於翻新工程嘅標書有效期已於八月屆滿，項目需要重新招標，推倒重來，最終受影響嘅又係普羅市民。再咁落去，醫院唔可以翻新，學校唔可以擴建，鐵路唔可以動工，房屋唔可以興建，整個社會好似停擺一樣，香港唔沉淪就奇咯！
最令人吹脹嘅係，面對堆積如山嘅工程項目，議會政客唔係迷途知返放棄拉布，而係一往無前繼續搞亂檔。反對派借題發揮，群起要求港府調動議程，話唔想耽誤有迫切性民生項目喎。呢啲咪叫顛倒黑白囉，如果反對派真心關顧民生，應該爭分奪秒審議項目，令民生工程盡快開展，而唔係不斷拉布，吵吵鬧鬧，阻撓工程，搞到全社會受害。搞事政客倒果為因，惺惺作態，簡直豈有此理，嗱，兩個小時嘅會議，單係爭拗係咪應該調動議程，已經用咗一個半小時，乜正經嘢都做唔到，大家話係咪混帳吖？
立法會嘅職責係監督政府施政，唔係阻撓政府施政，民意代表與民為敵，「垃圾會」外號可謂實至名歸。現時最令人擔心嘅係，反對派早已揚言發起全面不合作運動，抗爭行動勢將一浪接一浪，議會更加失控，港府更加跛腳，民生工程更加舉步維艱，佔中可唔可以落幕都無所謂咯，反正香港發展動彈不得，結局都係死路一條。
所以話啫，在街頭阻頭阻勢嘅路障要清除，在議會阻頭阻勢嘅人形路障更加要清除，否則香港永無寧日。正所謂，水能載舟，亦能覆舟，下次立法會選舉，就係票債票償掃除垃圾嘅時候。