政情：掛住睇手機 肥亨撞瘀眼
有關佔領行動嘅新聞同消息不停更新，為咗緊貼最新情況，好多人不停睇實個電話。尋日我哋見商務及經濟發展局前局長馬時亨（肥亨）出席活動時，隻左眼瘀咗又腫咗，原來佢就係因為早前掛住用電話睇新聞，搞到撞親隻眼。
肥亨話，早一個星期前佢去咗一個朋友家中，而呢位朋友屋企好大，佢當時掛住用智能電話睇新聞，一時睇唔到面前有塊大玻璃，於是撞咗埋去，隻左眼亦因為咁而瘀咗成個幾星期都未好番。佢話，現時出街隨時隨地都帶住支「去瘀膏」方便去到邊都可以塗，佢仲提醒大家搭港鐵時都唔好淨係掛住用電話，唔小心撞親就唔好喇。
不過，肥亨日前出席嶺南大學學位頒授典禮時，都唔多覺佢隻眼有乜異樣，可能塗咗藥膏消腫啩。當日佢獲頒榮譽社會科學博士榮銜，除咗致詞時被學生打斷發言外，更有學生於上台領取證書時向他提問「Do you hear the people say」，肥亨就回應「I do」，表明知道年輕人想抒發佢哋嘅睇法，但都希望同學將來學識尊重別人。