佔領行動逾三星期，大部分泛民主派都已經先後到各佔領區現身「抽水」，可以話驚死執輸行頭。不過，有人就姍姍來遲，咪就係「民主阿婆」前政務司司長陳方安生囉！佔領行動爆發二十幾日，從未見過佢出現，直到尋日先見到佢突然現身金鐘佔領區，點知佢逗留唔夠五分鐘就走人，估唔到佢「忽然民主」之後又再「忽然佔中」。
民主阿婆在佔領行動咁多日以來，從未在金鐘、銅鑼灣及旺角三大佔領區出現過，更未出聲發表意見支持。直到尋日下午六點鐘左右，我哋就發現民主阿婆由助手陪同下，施施然現身金鐘夏愨道。問佢係咪第一次到佔領區現場，佢就死都唔肯認，只係話近日由第二度返港，又話有咩講留返今日上電台講喎。佢講完逗留唔夠五分鐘就火速較腳閃人，莫非又趕住去恤髮？
其實民主阿婆一向對佔領行動一事唔敢高調表態，唔撐又唔反，一直扭扭擰擰咁。有知情人士就話，佔領係犯法事，作為前高官，加上民主阿婆又咁錫身，點會願意拋個身出嚟吖，唔通佢唔怕被人拉咩，真係一言驚醒夢中人。