政情：泛民玩嘢趕絕建制
近日泛民主派為咗配合佔領行動，於是在立法會內發起不合作運動，早前更成功「佔領」財務委員會轄下嘅工務同人事編制兩個小組委員會多數議席。建制派尋日就諗住「補飛」提出逾期申請加入工務小組，但被泛民玩嘢，話要就有關申請召開特別會議，要求相關議員解釋吓點解遲咗喎。其實過往都試過有泛民議員提出逾期加入委員會，建制派都冇留難佢哋。今次證明泛民又多項嚴人寬己嘅證據喇。
樹根批「好唔公義」
尋日工務小組開會，首要處理嘅係十二位建制派議員逾期加入小組委員會嘅申請。由泛民推舉為小組主席嘅梁家傑（袋巾傑）一開波就話，只有因病或未及回港而遲交嘅申請先可以批准，又話工務小組已積壓好多議程，為免影響審議工程項目，建議另開特別委員會處理呢啲遲交嘅申請喎，擺明就係玩嘢。
議員陳偉業（大舊）聽到就即時附和，話自己上屆想申請逾期加入人事編制委員會，頂替因衝擊替補機制論壇而入獄嘅議員梁國雄繼續「拉布」，但當時建制派就一面倒反對，所以佢今次都好想聽吓建制有乜解釋喎。大舊仲寸爆話，早前話因為助理一時大意，搞到要後補加入人事編制小組委員會嘅議員鍾樹根，將責任賴落助理度好唔公道。議員郭家麒仲加把口，話為咗還助理清白，應該叫埋助理參加特別會議，畀佢哋申冤，唔好等佢哋食死貓喎。
樹根聽完就批評泛民剝奪議員加入委員會嘅權利，係好唔公義，認為議員要入委員會「應入就入，要出就出」，唔應該受限制。議員譚耀宗更加批評泛民「人多蝦人少」，浪費議會時間。據了解，建制派為免「被審」，加上泛民冇可能放生佢哋，所以都唔考慮出席特別會議。
其實○三年泛民議員麥國風逾時申請加入《國家安全（立法條文）條例草案》委員會，同一○年議員何秀蘭及張國柱逾期申請加入研究法定最低工資附屬法例的小組委員會，建制派都冇阻撓佢哋。泛民今次玩嘢玩到咁盡，只會同建制派對立情況更加嚴重，議會撕裂實非市民之福。