港產官僚成日話民生無小事，講就好聽咯，弊在做起上嚟完全係另一回事。呢，港府兩年前提出「人人暢道通行」計劃，實牙實齒要將香港打造成無障礙城市，如今兩年過去，十畫仍然未有一撇，得個講字咋。
係人都知，香港人口老化，加上有不少傷健人士，行樓梯真係好辛苦，簡直攞命。好嘞，一等再等，盼到頸長，兩年前施政報告終於提出「人人暢道通行」計劃，以專款專用方式，為全港各區行人天橋及隧道加建升降機等無障礙通道設施，方便長者及殘障人士使用咁話。當局最後整合出一百五十八個項目交由路政署負責，再由十八區區議會選出五十四項優先加建升降機，整個計劃涉款近一億九千萬元。
家陣兩年過去嘞，斷估無障礙計劃進行得七七八八喇啩？鬼咩，實情係工程至今無影無蹤。好似港鐵彩虹站通往彩虹邨及牛池灣邨嘅「長命斜」行人隧道，原定今年上半年加裝升降機，點知到家陣都未有動靜。一班公公婆婆就慘嘞，由於隧道係買餸嘅必經之路，每日上上落落，氣喘吁吁，一個唔小心，隨時跌到一仆一碌，簡直靠害。市民睇唔過眼嘞，正如「東方報業民意調查」顯示，三成七受訪者怒轟漠視市民需求；三成五批評路政署歎慢板；兩成三直斥無障礙設施得個講字。
講起嚟令人難以置信，路政署負責嗰百幾個項目，真正完成嘅得兩個咁大把，其餘嘅仲喺度紙上談兵，最快四年後先有望完工。喂，上帝創造萬物只係用咗七日，港府加建升降機啫，又唔係乜嘢大工程，使唔使搞咁耐呀？嗱，有區議員係咁講嘅，當局冇咁大個頭，偏偏戴咁大頂帽，所有工程堆埋同一時間上馬，搞得掂至奇。上述民調又顯示，四成一受訪者擔心工程太多，恐不達標；兩成八直指施工進度緩慢；兩成六批評人手不足，影響進度。
至弊係，當局該做嘅唔做，唔該做嘅又搶住做，好似鑽石山龍蟠苑行人天橋咁吖，明明港鐵喺度加建升降機，點知路政署竟然喺同一地點加建兩部功能完全相同嘅升降機，兩者相距步行不足一分鐘，你話係咪嘥吖。
事實證明，當局所謂急市民所急，想市民所想，根本係大隻講。如果話無障礙設施係一座城市嘅文明標誌，本港無障礙設施天殘地缺，仲一拖再拖，就係港府嘅恥辱標誌嘞！