天文台前台長林超英無官一身輕後，仍然好關心香港時事政局，佢近日又撰文談及持續多時嘅佔中行動，慨嘆依家佔中已經變質，唔再似當初嘅純潔，呼籲學生係時候返屋企，而且應該讀好書，喺第二方面會發揮得更好。佢又認為，街頭戰線應該留返畀孔武有力、好勇鬥狠嘅人。林超英呢個說法，似乎認定咗學界中人無孔武有力嘅人物，唔知會否激發更多臥虎藏龍補位，甚至加入佔領行列呢？
