政情：泛民只許民調啱聽狠將反佔滅聲
每逢社會出現重大政治議題，唔少政黨都會委託學術機構進行民調跟進民意走向，不過佔領中環行動至今超過廿日，建制派團體不斷做民調反佔中，由泛民主派委託進行嘅民調幾乎連影都唔見，網上近日流傳兩份分別由民主黨（白鴿黨）同公民黨（公文袋）所做嘅佔中同政府處理手法嘅民調，當中大部分答案都係反對佔領行動，認為佔中對生活帶來很大影響等，莫非兩大泛民政黨一見到調查結果唔啱聽，就決定自我「滅聲」當無做過？
網上流傳嘅民調一律喺警方九二八施放催淚彈後進行，白鴿黨嘅民調由本月九日至十四日進行，訪問咗一千多人，七成五受訪者認同佔中對日常生活有影響，認為無影響嘅不足一成；超過六成表示不可接受佔中帶來嘅影響，只有一成多認為可以接受。當問及立法會議員對人大常委會普選框架下政改方案嘅投票取向，五成八指議員應投贊成票，大幅拋離投反對票嘅一成多，約有三成一則話無意見。
「唔係份份都出街」
公文袋嘅民調則於本月十三日至十六日進行，五成二受訪者同意警方喺處理佔中示威嘅手法，同樣有四成九受訪者唔認為特首梁振英同警務處處長曾偉雄應該立即辭職，不過亦有四成五受訪市民唔滿意政府喺處理政改同普選爭議嘅表現，略高於滿意嘅四成三。
公文袋黨魁梁家傑接受查詢時證實，有關民調係由該黨委託大學所做，白鴿黨黨團召集人單仲偕亦承認有做過類似佔中民調，但由於自己無詳細睇過份民調內容，所以唔知依家洩露出嚟嘅民調係咪同一份。佢又話該黨不時都會做民調，不過唔係每份民調都有出街，強調自己無隱瞞。
不過，泛民兩大政黨佔中民調被揭發自我「滅聲」之時，香港研究協會尋日公布本月中進行佔中民調，發現市民對佔領行動組織者同參與者嘅評價明顯轉差，當中六成八受訪市民唔支持佔領行動，近六成市民認為對日常生活造成明顯影響，另有四成九更估計佔中會以警方清場才能告終，唔知泛民兩大政黨會否參考多個民調結果，真正從市民角度出發發聲呢？