中環出更：監警會梁繼昌撐佔中收逾百投訴
獨立監察警方處理投訴委員會（監警會）本身應該政治中立，但最近亦因佔中捲入政治漩渦。話說監警會兩位委員梁繼昌（Kenneth）同馬恩國，先後因撐佔中同反佔中立場，以及佩戴或展示有象徵意味嘅顏色絲帶惹起爭議，據聞兩人至今仍然唔肯避席監警會會議，仲因各自立場鮮明收到唔少投訴信，截至上周為止，監警會已收到過百封涉及Kenneth佔中表態嘅投訴信。
至於分屬建制派嘅馬恩國亦唔好得去邊，因為佢喺社交網站將自己頭像改為代表撐警方嘅藍絲帶，隨即畀網民瘋傳，監警會亦陸續收到唔少涉及馬恩國嘅投訴信。
馬恩國社交網頭像撐警
據知所有同佔中有關嘅投訴個案，會交由監警會轄下嘅嚴重投訴個案委員會跟進，由於Kenneth唔係呢個委員會嘅成員，變相係間接避席，相反馬恩國本身係嚴重投訴個案委員會成員，究竟馬恩國會否主動避席，監警會又會點處理呢場風波，似乎遲早都要有個說法嘞！
卓妮