中環出更：仁愛堂籌款 董事鬥盛裝
慈善團體不時都會舉辦大型籌款活動，仁愛堂日前就喺電視台拍攝年度節目為旗下醫療、社企及教育服務等籌款。一班董事局成員個個悉心打扮，一早到場出席酒會兼預備綵排，卓妮見仁愛堂主席吳明珍身上嘅晚裝非常特別，上半部分領口位置略帶點中國色彩，配搭西式公主袖，原來佢一直都有搵開一個設計師幫佢度身訂造服裝，仲一幫襯就十八年咁耐。
吳明珍話，自己一向都好鍾意着中國特色嘅服裝，覺得尤其適合自己穿着，咁啱有次途經尖沙咀一間店舖時，佢就發現櫥窗內嘅服飾風格中西合璧非常獨特，市面上唔係經常可以搵得到，於是就決定大膽一試，搵咗該商舖設計師幫佢訂造晚裝，其後佢越着越覺得啱心水，不知不覺間就變成咗熟客仔喇。
主席一身中西合璧
據聞原來呢位設計師曾經同過仁愛堂合作搞時裝騷，吳明珍大讚對方非常了解唔同顏色襯邊類型膚色。
仁愛堂副主席史顏景蓮同佢老公、仁愛堂前主席史立德，副主席羅台秦同總理賴楚惠等人亦盛裝出席，現場所見史立德嘅眼紅紅，原來佢話當日對眼痛痛哋，所以去咗旺角睇醫生，撞正依家咁多示威者喺旺角聚集，不過佢一啲都唔驚，認為只要醒目避開就得。
東華前主席陳文綺慧（Viola）都來捧場，一身綠色飄逸晚裝嘅佢令人眼前一亮。雖然近日天氣乾燥，但Viola雙唇睇落卻好滋潤，原來係有秘訣。佢透露，自己每日出門前都堅持先揸潤唇膏保護個咀，所以話想靚係要付出嘅。
卓妮