有人話，堡壘最容易從內部攻破。真係冇講錯，內憂比外患更難防，更可怕。呢，香港回歸十七年，亂足十七年，咪就係因為港府裏面充斥無間道囉。
話說一位出任佔中期間警方發言人嘅女高級警司，日前會見傳媒時居然頭戴回歸前皇冠警徽嘅警帽，被識穿之後，佢解釋話「睇漏眼」，扣錯警徽喎。你信唔信吖？皇冠警徽已經停用超過十七年，話就話警務人員可以留為紀念啫，但最多係自己收埋欣賞，點都冇理由戴住佢招搖過市，唯一嘅解釋係，有人對舊主人念念不忘。
嗱，功夫茶唔係亂噏。日前有海外傳媒報道，中央已查獲港府中有幾名司局級官員係「紅皮白心」，表面上擁護中央，私底下同佔中分子勾勾搭搭，當局已有充分證據，適當時候就會揭露咁話。正所謂，空穴來風，未必無因，睇番回歸以來尤其係最近嘅佔中亂局，就知道相關報道唔係危言聳聽，如果唔係內奸作祟，香港又點會七國咁亂吖。試諗吓，連司局級高官都係紅皮白心，呢位女高級警司頭戴皇冠警徽見記者又有乜出奇呢？再咁落去，遲早有人「睇漏眼」喺金紫荊廣場或者政府總部扯起英國旗都似！
最奇怪嘅係，七名警務人員被指「濫用暴力」對付佔中人士，需要停職接受調查，但負責跟進嘅監警會多名委員係佔中支持者，有預設嘅政治立場，咁你話嘞，佢哋會唔會不偏不倚吖？調查結果會唔會公平公正吖？
所以話，香港問題千頭萬緒，歸根究柢就係因為主權回歸，治權未歸。回歸十七年後嘅今日，港英餘孽依然呼風喚雨，佢哋身在漢營心在曹，唔搞破壞至奇。例如有「民主阿婆」之稱嘅陳四萬咁吖，對洋主人念念不忘，郁吓就飛去英國求援；又如曾蔭權咁吖，做咗特首都唔肯放棄爵士銜頭，話佢唔係無間道都冇人信喇。其實又難怪嘅，呢班餘孽飲英國人奶水長大，對英女王忠心耿耿都好正常啫。功夫茶有時真係懷疑，香港究竟係誰家天下？
講番今次佔領行動，話就話係佔中搞手及學生組織發起，其實好多人都知道幕後黑手及外部勢力至係始作俑者，佢哋搞亂香港唔出奇，最匪夷所思嘅係，連港府司局級高官亦同佢哋眉來眼去，勾勾搭搭，問你怕未。唔怪得佔領行動愈玩愈激，遲遲唔肯收手喇，有人裏應外合，明幫暗助，唔搞死香港又點肯罷休吖。事實證明，內憂比外患更可怕，香港要撥亂反正，收拾殘局，首先必須清除內奸，將紅皮白心嘅餘孽及無間道連根拔起，如果唔係，講乜都冇用！