佔領行動持續咗約三個星期，近日位於金鐘同旺角嘅示威者同警方屢爆衝突，真係唔知佔領幾時先至會落幕。佔中發起人之一嘅陳健民尋日就話，佔領行動一旦到咗最後時刻，佢哋就會接受被捕，就算警方唔拘捕，佢哋都會去警署自首。不過，究竟佔領行動幾時會完結，相信陳健民自己都未必知道，事關即使學聯同政府談判有成果，但佢話今次係自發運動，市民可以自行決定係咪繼續留守喎，咁佔領行動豈不是沒完沒了？咁陳健民開出嘅自首「期票」，咪唔知有冇兌現嘅一日？
