政情：郭偉強結婚 請唔晒咁多人
立法會議員郭偉強明年二月就會同拍拖多時嘅女朋友拉埋天窗，依家二人正密鑼緊鼓籌備婚禮。郭偉強透露，結婚細節差唔多已經搞掂，但就煩緊擺酒點算好。事關佢諗住請晒成個立法會同東區區議會所有同事，但依家就搵唔到大型酒家，搞到非常頭痛。
菜單剔走魚翅夠環保
郭偉強話，由於佢熱衷傳統中式婚禮，所以擺酒都想揀番酒樓，但由於唔少酒樓最多只係擺到四、五十圍，如果請晒又唔夠位坐，只係請一部分人又唔係咁好。佢哋開頭都有諗過喺酒席前搞個小小嘅雞尾酒派對，招呼晒所有朋友，但問吓價錢竟然要成十多萬元，於是打消念頭。
除咗煩緊請唔晒咁多朋友外，郭偉強開頭仲想以環保為由，諗住將酒席嘅八道菜減至六道菜，唔使製造咁多廚餘，但就被女朋友話咁做好似好寒酸咁。雖然佢最後都聽女友話，但就決定菜單上剔走魚翅，為環保出一分力。