政情：梁世民義助智障人士洗牙
補牙、剝牙，看似簡單的牙齒治療，但對於智障人士，隨時要輪候三、四年。香港牙醫學會會長梁世民早前與無障牙科學會齊發起「盈愛牙科服務」，為二十年未嘗洗牙滋味的智障人士，洗靚棚牙。智障人士的爛牙問題頗受關注，梁醫生話，曾見過一位七歲智障童，因牙痛多時無法表達，不停撞牆自殘，嚇得家人不知所措，直至牙醫幫佢修補爛牙，暴躁情緒終於平靜下來。
獲政府資助
不過，為中度及嚴重智障人士修補牙齒難度極高，梁醫生話，因病童大多不善表達痛楚感受，加上在治療時佢哋好易產生過激反應，整傷自己，故即使進行補牙或剝牙治療，牙醫亦需先為佢哋全身麻醉。惟現時在公立醫院排期等麻醉，需時三至四年，「試問牙痛點忍到三、四年？」有見及此，梁醫生發起「盈愛」計劃，早前獲政府資助經費，由私家醫院提供優惠麻醉治療，至今已為二百名智障人士提供牙齒治療。