中環出更：北區鄉會「單車」冧選民

新界鄉紳除咗大把地仲大把車，如果唔係點喺幅員廣闊嘅新界地通行無阻？不過，鄉紳最近原來潮興玩單車，經常揸名車出入嘅上水鄉事委員會主席侯志強，尋日更牽頭成立「香港單車協會」推廣單車運動，仲搵咗鄉議局主席劉皇發等一齊出任永遠榮譽會長，但最養眼相信係請到喺元朗大棠村長大嘅前港姐冠軍鄭文雅出任單車大使。

打開高爾夫球嘅鄭文雅自豪咁話作為新界人，六歲起已經自學大人單車每日來回上水返學，即使依家已經搬咗出跑馬地住半山，早前仍靜靜雞買咗架單車，得閒「飛車」落斜到地面行街，可惜半年後被老公發現，仲以安全理由沒收單車添。鄭文雅笑言，出任單車大使就可以大條道理買番架單車踩喇！

侯志強致詞時就雄心壯志，話適逢新界多條單車徑先後落成，都要幫手推廣單車文化至全港、東南亞甚至全世界，協會仲計劃組隊參與內地鹽田單車節添。呢個協會主要由侯志強等幾個北區鄉頭揸旗，據講係為未來一連串選舉開拓北區年輕村屋居民票源，以單車話題取代傳統蛇齋餅糉，更易冧年輕選民咁話。

卓妮