中環出更：羅啟妍鴛鴦打扮顯生活態度
政府近年致力推廣創意工業，國際著名珠寶設計師羅啟妍早前就將過往十次都在美國紐約舉辦的亞洲協會「羅啟妍藝術設計文化講座」，首度帶到來香港舉行，畀大家探討設計及創意在當代社會嘅角色。卓妮見到向來愛以鴛鴦造型打扮嘅羅啟妍，呢日只戴單邊耳環，唔通又係一種新潮流？佢笑笑口話，冇留意只係戴咗一邊，可能唔記得咗喎，不過着鴛鴦鞋就真係習慣，但亦唔需要特登去襯，因為早已變成佢嘅一種生活態度。
裝飾設計 十分大氣
當日羅啟妍一身打扮好隨性，盡顯個人風格，連佢手上戴住嘅戒指都係由四顆唔同顏色嘅大珍珠組成，十分大氣。佢話隻戒指係好多年前的設計，佢好鍾意。當日講座臨開場前，馮氏集團主席馮國經（Victor）匆匆忙忙趕到，原來佢同羅啟妍由細玩到大，所以幾忙都要來捧場，Victor仲話好欣賞羅啟妍嘅設計同創意。
當晚演講嘉賓仲有著名科技企業家兼Outblaze創辦人蕭逸及創意經濟之父約翰．霍金斯。對於已經持續超過二十日嘅佔中運動，蕭逸有比較另類嘅睇法。經常游走唔同地方工作嘅佢話，撇除討論呢場運動嘅結果，二十幾日以來，港人凸顯咗一種特質，就係同身邊陌生人合作嘅能力非常之高，例如運送物資咁，萬一有日不幸發生天災，預計港人一定可以好高效率咁互相配合，印證香港市民嘅質素的確好高喎！
卓妮