可以三日不食飯，不可一日無水飲，水比食物更重要0架。正當本港為咗佔中家嘈屋閉嘅時候，輸港東江水又傳出加價消息，港府焗住加水費只係遲早嘅問題，基層市民百上加斤。問題係，喺今時今日嘅社會氣氛之下，仲有邊個會關心民生吖？仲有邊個會為民發聲吖？
三年一次嘅港府向內地購買東江水協議今年底屆滿，新一輪協議將於下周公布，消息透露，由於內地通脹持續高企、人民幣升值，以及處理東江水成本上升，新購水價會進一步上調，每年加幅約為百分之六至七，三年累計港府至少多付十四億元。正所謂，羊毛出自羊身上，東江水漲價，港府勢必將成本轉嫁社會，最終受影響嘅又係普羅市民。嗱，唔係靠嚇，水務署正研究加水費，加幅隨時達雙位數，雖然話現時每戶平均每季水費只係幾百蚊，加費金額有限，但小數怕長計，尤其漣漪效應層層擴散，話唔影響民生就係假嘅。
唉，講起實在無奈。水係生存之源，市民無論生活起居或者生產營商，都唔能夠冇潔淨水源，而偏偏香港嘅食水命脈掌握喺內地手中，東江水要加價，港人根本無討價還價嘅本錢。現實就係現實，唔想接受都要接受，睇怕今次加水費，市民係走唔甩嘅嘞，家陣惟有希望內地當局發財立品，收足半斤價，交足八両貨，認真監管東江水水質，確保港人食水衞生，千祈唔好令香港納稅人倒錢落鹹水海吖！
一滴水看世界，從一條東江水就睇到中港兩地嘅主客關係。講到底，香港係中國一部分，係一個特別行政區，失去呢個母體支持，隨時連生存都有問題，遑論繁榮穩定歌舞昇平。可惜嘅係，偏偏有人不顧現實，偏偏要以卵擊石，對內地百般抗拒，甚至視中國為洪水猛獸，企圖搞港獨或者將香港當成政治實體，呢種想法唔係狂妄自大，就係幼稚無知。莫講香港根本無可能搞獨立，就算搞得成，只要內地停止向港輸入食水同食品，香港即刻斷水斷糧喇，到時激進派連喊「中國人滾回中國去」嘅力氣都冇咯。當然喇，斷水之虞唔止講緊東江水，內地只要全面叫停個人遊咋，香港經濟已經瓜得。
所以咯喎，佔中示威者真係要平心靜氣諗一諗，除非閣下可以移民外國遠走高飛，又或者想學洋奴漢奸收美金搞亂香港，如果唔係嘅話，最好都係唔好破壞呢個家，搞亂搞死香港，最終受害嘅咪都係基層大眾。
一句講晒，政治不能當飯吃，因噎廢食如自殺。無論大家係咪喜歡，祖國係冇得揀嘅，雙方同飲一江水，同坐一條船，只有和平共存，尋求雙贏，香港才有出路，港人才有明天。